2006-11-01

Kuranda

Hüt isch ume chli meh los gsi, aus nume wösche u pfuse. Mir hei nämlech ä Usflug nach Kuranda planet.
Dr ganz Usflug hät äm zäh vor nüni söue starte. Wo de äm zäh ab nüni immer no ke Bus isch i Sicht gsi si mer de einisch zur Rezeption ga frage, wie wen u was. Si hei de telefoniert u gseit, dass dr Chauffeur üses Hotel nid fingi, wüu är nöi isch. Si schicke üs aber äs Taxi. Mittlerwile isch äs scho gäg di haube zähne gange, u den hät dr Zug söue abfahre, toll. Z Taxi isch de när o däm entsprächend gfahre, aber mir si ganz äm Bahnhof acho!
Witer isch äs äbe de när mit äm Zug gange. Si hei da normau gäg di 14 Wäge, oder no meh, a nä nang. Dr Zug het sech langsam immer wie höcher kämpft u äs isch ä ungloubleche Ablick gsi, i Rägewaud, oder ufe Rägewaud z luge.

Wo mer de ar Ändstation acho si, si mer de ga z Dörfli aluege. Es het dert ganz ä hufe Lädeli, houptsächlech mit Souvenirs, aber o Läde, wo d Aborigines ihri Kunstwärk tüe verchoufe. Dr Tom isch vo eim Didgeridoo zum angere gschuehnet, aber är het sech bis ize no nid chönne entscheide, weles o vorauem wo ärs wot choufe. Mir hei de när ä Deal gmacht, dass we mer ume retour si, i ga ga Charte schriebe u är no z Cairns geit ga witer luege! Aber äbe, dass isch de ä angeri u speteri Gschicht.
Mir si, nachdäm mir dür di verschiendene Lädeli gflaniert si, witers i Koala Garden. Scho ume Koalas, aber irgendwie überchömme mir eifach nid gnue vo dene schnüssige Tierli! Mir hei de dert ömu no Glägeheit gha, ä Koala ufe Arm z näh! Oder angers gseit, i ha d Glägeheit gha!

Witer isch äs de när i Vogupark gange. Di Tier dert si u zuetroulech, scho fasch ufdringlech!!! Äs het dert ei Papagei gha, wo u gärn uf dr Hang ghocket isch, i weiss o würum. Viellecht isch äs ize grad ä chli unaständig, aber i verzeue äs glich. Dä cheibe Vogu het sech nämlech eine abgriebe! I kenne ä Nymphesittich, wo das a Socke macht, aber z angere isch mer nöi

D Zyt isch ömu bi dene verschiedene Besichtigunge sehr schnäu verbi gange, so dass äs de scho ume gheisse het, retour uf d Gondeli, wo üs de ume abe bracht hei! Isch cheibe idrücklech über dr Rägewaud z schwäbe, aber o schön.

Wi i scho erwähnt ha, höckle i ize da im Internet u dr Tom isch äm Didgeridoo aluege oder ussueche!