2006-10-21

Schlächts Wätter

Sodeli, ize gits ume einisch ä Itrag uf Bärndütsch. Was mir Geschter vergässe hei z erwähne, isch wi äs üs ergange isch mit Outofahre, mit äm Linksverchehr. Tja, mir si sicher beidi afa einisch froh gsi, dass mir ä Outomat hei gha, wüu i gloube schüsch wär äs no einisch schwieriger worde.
Äm Afang isch immer ume dr Schiebewüscher glofe, wüu dr Tom igentlech hät wöue dr Blinker setze, aber äbe, isch ja aues verchehrt, mischt. O het äs Momänte gä, wo mir dr Sicherheitsgurt uf dr fautsche Site gsuecht hei, dr Griff isch meischtens iz lääre gange. Z fahre isch igentlech guet gange, so lang öper vor üs isch gsi, de hei mer üs a däm chli chönne orientiere. Äs het de aber angers usgseh, we mir z vorderscht are Chrüzig si gstange. Hei mängisch im letschte Momänt müesse korrigiere, wüu mer us luter Gwohnheit hei rächts wöue fahre. Aber bis ize hei mer no ke Unfau bout, dass isch doch öpis, oder? Geschter si mer ono froh gsi, dass mer ä Klimaalag im Outo hei gha, u Hüt si mer dankbar um d Heizig gsi. Isch scho extrem di Wätterungerschiede.
Während äm hütige z Morge faht äs plötzlech afa horne, aber niemer het irgendöpis drgliche ta. Churz druf ache chunnt de öper zu üs, u o de angere wo äm z Mörgele si gsi, u seit, dass das gehorne dr Füralarm sigi, toll. D Lüt hei sech de när uf dr Strass versammlet, gwüssi nume ir Ungerwösch, brrrrrrrrrrrrrr!

Si äm Morge no einisch zum Echo Point gange. Z Wätter isch eher schlächt gsi u mir hei lang gwährweiset, ob mer üs no mit dr Scenic Railway i Rägewaud wei vorwage, oder lieber im trochene Oute witerfahre. Mir hei üs de für z erschte entschiede u si ömu nid enttüscht worde. Bim Railway bi i froh gsi, dass i nid z vorderscht ghocket bi, wüu äs isch fasch sänkrächt ache gange. När isch idrücklech gsi, zwüsche dene Boustämm däsume z loufe, u mir hei ono drbi verschiedeni Sache chönne lehre, wi zum Bispiu sech ä Boum jedes Jahr tuet "hüte", damit är "verletzige" cha usgliche.
Witer isch äs de när Richtig Newcastle gange. Mir si viu uf dr Outobahn gfahre u hei üs zwüschdüre scho gfragt, würum mer ächt ufem massgäbleche Pannestreife nid darf ahaute. Irgendeinisch isch äs de klar gsi, wüu dass wird aus Velowäg brucht!!!!!?????
Igentlech hätte mir im Sinn gha, dass mer z Port Stephens übernachte, aber dass isch unmüglech gsi. Aues isch usbuechet gsi, u so isch üs nüd angers übrig bliebe aus witer z fahre. Z fahre isch de mit äm dunkle immer wi müehsamer worde, irgendwie blände di Schienwärfer meh, aus bi üs ir Schwiz. Ha äm Tom äs paarmau anerbote für zum fahre, aber zum Glück het är immer ume abglehnt.

Hei ize z Bulahdelah, äs chlises irgendöpis ä Übernachtigsmüglechkeit gfunge. Während i das da schriebe, isch mi Ma (tönt guet) scho äm schlafe, u äs isch no nid ä mau nüni. Chehrt är ize, geit är ize ächt immer so früech schlafe u steit är de äm Morge jedesmau äm sächsi uf? Lö mir üs ize einisch la überrasche.